Ən son yeniliklərdən xəbərdar olun!

Bakı, 24 aprel 2025 — Dünyanın aparıcı video müşahidə texnologiyaları istehsalçısı Hikvision tərəfindən təşkil olunan Hikvision Partner Day 2025 tədbiri bu il Four Seasons Hotel Baku-da uğurla baş tutub. Tədbirdə Hikvision-un Azərbaycandakı ilk rəsmi distribütoru olan ABV şirkəti fəal iştirak edib.

250-dən çox qonağın iştirak etdiyi bu nüfuzlu tədbirdə təhlükəsizlik sahəsində yeni texnologiyalar, əməkdaşlıq imkanları və 2025-ci il üçün inkişaf planları təqdim olunub. Tədbirin açılış mərasimində Hikvision vitse-prezidenti Ms.Viviana, Hikvision CATC prezidenti Leo Tang, Hikvision Azərbaycan rəhbəri Erica Xu və digər yüksək vəzifəli şəxslər çıxış edərək şirkətin regional strategiyaları ilə bağlı önəmli fikirlər səsləndiriblər.

ABV tədbir zamanı xüsusi stendi ilə diqqət mərkəzində olub. Eyni zamanda, ABV təsisçisi Surxay Ələkbərov səhnədə çıxış edərək tərəfdaşlara ABV-nin hekayəsindən, Hikvision ilə əməkdaşlığından danışıb.

“Hikvision ilə uzunmüddətli və etibarlı əməkdaşlığımız nəticəsində təhlükəsizlik sahəsində innovativ həlləri Azərbaycan bazarına təqdim etməkdən məmnunuq,” – deyə ABV şirkətinin təsisçisi çıxışında bildirib.

Həmçinin Hikvision tərəfindən ABV şirkətinə "Authorized National Distributor" sertifikatı və "Most Reliable Partner and Titan of Sales" mükafatı təqdim edilib. ABV şirkətinin Kommersiya direktoru İdrak Novruzov isə tədbir iştirakçıları üçün maraqlı hədiyyələr təqdim edib.

Tədbir çərçivəsində keçirilən texniki sessiyalar, interaktiv zonalar və şou proqramlar vasitəsilə tərəfdaşlar arasında əlaqələr gücləndirilib. Hikvision-un HPP və DPP proqramları təqdim edilərək distribütorlarla qarşılıqlı inkişaf imkanları müzakirə olunub.

ABV — təhlükəsizlik sistemləri sahəsində ixtisaslaşmış, Hikvision-un Azərbaycandakı ilk rəsmi distribütorudur. Şirkət müasir texnologiyaları ölkəyə gətirməklə yanaşı, tərəfdaşlarına güclü texniki dəstək və geniş məhsul çeşidi təqdim edir.